好，入正題。受風切減弱，輻合轉好，水溫配合，天鴿的強度今日明顯上升，由於離岸邊仲有一段隔離，強度會穩定上升。值得注意係香港岸邊水溫偏高，當颱風接近時就再唔會捲起深層較凍的海水，變相直接吸收依個淺水區域的熱能量，到時強度有可能急升。至於路徑，由於副高係尋日連接，天鴿北向量唔會多，以西向量為主，後期受地型因素同自身內力先有北向量。跟據現時各大機構預測，登陸地點為斗門附近。雖然預料登陸地點唔係香港，但坐巴士的颱風一般速度較高，係危險半圓效應下，香港風力疊加後會變得很高。當颱風西掠香港時，由於地型因素，香港市區會因食正東風而比較顯得較大風。天鴿飛行速度依家為25km/hr，相信係愈黎愈肥同北向量增加的情況下會緩慢減速。另外，適逢天文大潮，風暴潮將會出現，低窪地區人仕應特別注意安全。即使身處安全地方的大家無咩野都唔好出街喇，依個風有一定威力，絕對唔係「洛克人」同「蓮花一現」的級數。 至於掛咩波，8號應該走唔甩，預計凌晨會掛(可以從風場圖估到點解)，至於掛幾耐，個人認為至少覆蓋聽日早上、中午，會否直落下晝去到傍晚，就要睇夜晚移動速度同登陸後的減弱速度而定。